ქართული ოპოზიცია ამ შაბათს აპირებს  საპროტესტო აქციის ჩატარებას. თუმცა, საქართველოში უკვე ყველა  დარწმუნებულია, რომ ქუჩის  პოლიტიკის ადგილი დღევანდელობაში აღარ არის. მიტინგი, ალბათ, უბრალო ტრადიციაა. სინამდვილეში კი ოპოზიციამ მთელი ძალები გადართო ადგილობრივი თვითმმართველობის არჩევნებზე. თუმცა აქაც საკმაოდ ნაცნობი სურათია. თითქმის ყველა ოპოზიციური პარტია აპირებს საკუთარი კანდიდატის წამოყენებას თბილისის მერის პოსტზე.

რადიკალური  ოპოზიციის ნაწილი აპირებს  მორიგი საპროტესტო ტალღის დაწყებას 7 ნოემბერს. ეკა ბესელია თვლის, რომ ყველა ოპოზიციური გაერთიანება მხარს დაუჭერს ქუჩის საპროტესტო აქციების ინიციატივას. მისი თქმით, ეს დღე ოპოზიციის ყველა ძალას აერთიანებს. ოპოზიციის ღონისძიებები ჩატარდება რუსთაველის გამზირზე, შსს-სა და ტელეკომპანია "იმედის" შენობების წინ.

თუმცა ტრადიციულ ქუჩის პოლიტიკასთან შეერთებას ჯერ არ აპირებენ რესპუბლიკელები, "ახალი მემარჯვენეები" და არც ზურაბ ნოღაიდელის მოძრაობა "სამართლიანი საქართველოსთვის". ექსპერტები ერთმანეთს ეთანხმებიან, რომ ხელისუფლებასა და ოპოზიციას შორის ძირითადი ბრძოლა მოსალოდნელია ადგილობრივი თვითმმართველობის არჩევნებზე.

ირაკლი  ალასანიამ უკვე განაცხადა, რომ აპირებს თბილისის მერის  პოსტზე კენჭისყრას. არავის ეეჭვება, რომ ოპოზიციონერები აპირებენ თავად სააკაშვილის  პოლიტიკური გზის გამეორებას. პრეზიდენტობამდე ის ხომ საკრებულოს თავმჯდომარე იყო.

თუმცა კანდიდატები, როგორც ყოველთვის, ბევრია. დღეს ქართულ მასმედიაში გავრცელდა ინფორმაცია, რომ  არასაპარლამენტო ოპოზიცია გაჩეჩილაძეზე დებს ფსონებს.

გაჩეჩილაძეს ემხრობა ოპოზიციის რადიკალური ფრთა - "დემოკრატიული მოძრაობა ერთიანი საქართველო" ნინო ბურჯანაძის ლიდერობით, ირაკლი ოქრუაშვილის პარტია "ერთიანი საქართველოსთვის",კონსერვატორები და პარტია "საქართველოს გზა", რომელსაც სათავეში უდგას საგარეო საქმეთა ყოფილი მინისტრი სალომე ზურაბიშვილი.

არასაპარლამენტო ოპოზიციაში უკმაყოფილება გამოიწვია ირაკლი ალასანიას კანდიდატურის წამოყენებამ. თუკი ალასანია გაიმარჯვებს, ის გახდება საქართველოს პრეზიდენტობის პოტენციური კანდიდატი. ამიტომაც, ისეთ ოპოზიციურ მოღვაწეებს როგორიც ბურჯანაძე და ოქრუაშვილი არიან, არ აწყობთ პოლიტიკური პროცესების მიღმა აღმოჩენის პერსპექტივა.

თავად ირაკლი ალასანია და მისი მომხრეები  ჯერჯერობით თავს იკავებენ ოპოზიციის რადიკალური ნაწილის  გაერთიანების თაობაზე კომენტარების გაკეთებისგან.

ახლახან კონსერვატიულმა პარტიამ  პრაიმერიზის მეთოდიც კი შესთავაზა ოპოზიციონერებს ერთიანი კანდიდატურის გამოვლენისთვის. განხილვის შემდეგ თითქოსდა ყველა პარტია დათანხმდა  ამას.

"მერობის  კანდიდატი "სახალხო პარტიიდან" ვარ მე,- განაცხადა ამ პარტიის  ლიდერმა კობა დავითაშვილმა,- მოვუწოდებ ყველა კანდიდატს, ვინც დასახელებულია უკვე, ვგულისხმობ ალასანიას ან მას, ვისაც არჩევნებში სურს მონაწილეობის მიღებას, აქტიურად ჩაერთოს ოპოზიციისგან ერთიანი კანდიდატის გამოვლენის პროცესში პარიმერიზის გზით".

მაგრამ  საერთო კანდიდატი ჯერ არ დაუსახელებია ოპოზიციას. იმედი გვაქვს, რომ ეს საკითხი მალე მოგვარდება.

თუკი  ოპოზიციის ნაწილი გაერთიანდება და მერის პოსტზე წამოაყენებს  ლევან გაჩეჩილაძეს, არავინ იცის როგორ მოიქცევა ირაკლი ალასანია.

ამასობაში, არც საპარლამენტო ოპოზიციაა  უმოქმედოდ. საპარლამენტო უმცირესობისა და ქრისტიან-დემოკრატიული მოძრაპბის ლიდერმა გიორგი თარგამაძემ განაცხადა, რომ მისი პარტია აქტიურ კონსულტაციებს ატარებს თბილისის მერის პოსტზე წამოსაყენებელი კანდიდატურის შესარჩევად.

"ჩვენი  მიზანია არჩევნებზე წარვადგინოთ  ისეთი ადამიანი, რომელსაც ძალიან დიდი გამოცდილება აქვს, რომლის სახელიც დაკავშირებული იქნება შენებასთან და არა ნგრევასთან",- განაცხადა თარგამაძემ.

Print version