საქართველო მეზობელ ქვეყანას აიარაღებდა?

საქართველოს ოფიციალური სტრუქტურები 2008 წლის აგვისტოს ომის დროს იარაღს და ტყვია-წამალს ყიდდნენ. ამ სენსაციურ ინფორმაციას ექსპერტი მამუკა არეშიძე აქვეყნებს. არეშიძის მტკიცებით, იარაღი რამდენიმე სამხედრო ბაზიდან გაქრა, ხოლო მოგვიანებით თავდაცვის რამდენიმე საწარმოს ანგარიშზე დიდი ოდენობით ფულადი თანხა იყო ჩარიცხული. ექსპერტი არ ასახელებს იმ ქვეყანას, საიდანაც ეს თანხები შემოვიდა. 

ექსპერტი კავკასიის საკითხებში და ბიძინა ივანიშვილის გუნდის წევრი მამუკა არეშიძე წინა ხელისუფლებას სერიოზულ ბრალდებებს უყენებს. არეშიძე არც მეტი არც ნაკლები 2008 წლის აგვისტოს ომის დროს იარაღით ვაჭრობაზე საუბრობს.

„როდესაც 2008 წელს ქართულმა ჯარმა ბაზები დატოვა, სადაც რუსული ჯარი შევიდა, აუციელებელი იყო ამ ბაზის და შეიარაღების განადგურება. საუბარია ბაზაზე სენაკში, გორში და ნორიოში, რომელიც მაშინ საქართველოს შსს-ს ქედანაყოფმა დატოვა (იქ რუსული ჯარი არ შესულა). მე მაქვს იმ სამხედროების მიერ მოწოდებული ინფორმაცია, რომლებიც ბაზას იცავდნენ, რომ 12 აგვისტოს საღამოს 8 საათზე მათ მიიღეს ბრძანება დაუყოვნებლივ დატოვონ ბაზა. ამ ბრძანებას ბაზის მეთაურმა უპასუხა, რომ თუ ისინი ამ ობიექტს დატოვებენ, მას აუცილებლად გაძარცვავენ. ამაზე მათ ასეთი პასუხი მიიღეს: „ეს თქვენი საქმე არ არის, დაუყოვნებლივ დატოვეთ ბაზა" - განუცხადა არეშიძემ ჟურნალისტებს.

შემდეგ ექსპერტი ყვება, რომ ბაზის დატოვების შემდეგ სპეცრაზმის წარმოამდგენლებმა იქ შუქი დატოვეს ჩართული, რომ შეექმნათ ილუზია, თითქოს ბაზაზე ვინმე იმყოფება. მიუხედავად ამისა, დაახლოებით 2 დღეში, როცა ყველაფერი ჩაწყნარდა, სპეცრაზმის წარმოამდგენლებმა, ბაზაზე დაბრუნების შემდეგ აღმოაჩინეს, რომ იქიდან 200 ათასი დოლარის ღირებულების იარაღი და აღჭურვილობა იყო გატაცებული.

„გამოდის, რომ ეს ბაზები უყურადღებოდ იყო დატოვებული როგორც მინიმუმ დაუდევრობის გამო, თუმცა მე სხვა ეჭვები მაქვს იმასთან დაკავშირებით თუ რატომ იყო იარაღით სავსე ბაზები დაცვის გარეშე მიტოვებული", - განაცხადა არეშიძემ ჟურნალისტებთან საუბარში.

მისივე ინფორმაციით, უკვე 2008 წლის სექტემბერში თავდაცვის რამდენიმე საწარმო კანონიერ მფლობელს ჩამოერთვა. ერთ საღამოში ისინი სხვა პირებზე გადააფორმეს და ეს ყველაფერი ერთდროულად ხდებოდა. უკვე მეორე დღეს ამ საწარმოების საბანკო ანგარიშებზე დიდი თანხა - დაახლოებით 69 მილიონი დოლარი იყო ჩარიცხული, რომელიც მამუკა არეშიძის განცხადებით, „ერთ-ერთი მეზობელი ქვეყნიდან იყო გადმორიცხული". „უკვე საღამოს ეს თანხები საბანკო ანგარიშიდან ქრება, რაც გარკვეულ ეჭევბს ბადებს. ეს საწარმოები შემთხვევით არ იყო შერჩეული. ყველა მათგანს კავშირი ჰქონდა იარაღის წარმოებასთან. რა თქმა უნდა, მათ ჰქონდათ ფულადი სახსრების გარკვეული მიმოქცევა, მაგრამ არა იმ ოდენობის, რაც ჩენს ეჭვებს კიდევ უფრო ადასტურებს" ამბობს არეშიძე.

კოდი დღიური

  Print version